洪卓立與湯怡的分手風波，鬧出連串是非，一時有指陳家樂介入戀情做第三者，一時又有傳湯怡嫌棄洪卓立一直半紅不黑，狠心分手。雖然面對綠帽疑雲，但洪卓立今日現身時，依然處處維護舊愛，更一度流遭男兒淚：「佢唔係大家所講嘅貪慕虛榮嘅人，我同佢冇任何因為金錢嘅原因而走埋一齊，亦唔存在佢痴我去上鏡。作為好朋友，甚至男女朋友嚟講，我唔想佢俾人批判。而且我私底下有同陳家樂講唔好意思，因為完全唔會諗到拉到佢落水，最起碼我哋三個都係好朋友。網上見到有人話呢個世界冇真愛㗎喇，11年都會散，咁sweet都會散，但我希望大家同我一樣仲相信愛情。」
洪卓立的感言加上眼淚，雖然分手但依然竭力維護舊愛的表現，令人不禁想起早前陳家樂亦以同樣態度回應與余香凝的分手風波，難怪不少網民預測洪卓立絕對有力繼家樂之後，以容易受傷的男人姿態成功爆紅，其實睇返洪卓立本身條件，絕對唔差，難怪有人預計2019年就是立立上位之年。
1. 對女朋友好
洪卓立是個非常維護女朋友的男人，他入行不久便與同公司的湯怡撻著，自此處處維護舊愛，兩人拍拖期間，有傳湯怡因貪錢怒飛立立，男方即時開火還擊：「出面個個話佢，我頂唔順一個二個覺得比我更了解佢，連老闆 (楊受成) 都話我夠薑！」而其後又有傳湯怡被人問價，再次激嬲立立：「嗰個人誤會湯小姐職業，所以我將件事公開，原來公司事後都有打返去比問價呢個人，不過電話唔通。」
2. 對兄弟好
其實洪卓立唔止對女友好，對兄弟一樣咁好，他與吳浩康兄弟情深，就連當年阿Deep負面是非一籮籮，他仍公開力撐兄弟：「我睇到大家睇唔到阿Deep嘅一面，佢絕對唔係傳聞所講咁差嘅人。」睇見洪卓立咁力撐自己，阿Deep當然有回禮： 「喺我眼中洪卓立永遠都係一個『衰』靚仔嘅歌手，佢真係好慘，個樣好睇，啲人就唔會留意佢嘅實力。」
3. 對粉絲好
除了情人與朋友，洪卓立對粉絲一樣咁好。2009年患上肺積水與死神搏鬥，最終成功「返生」，他最感激是一班不離不棄的粉絲：「入行十年裡面唔理發生咩事，有冇所謂嘅成就，我都覺得要感激粉絲，如果冇咗呢班人，我咩都唔係。但我把口幾唔肉麻，唔鍾意說出口，唔識氹佢哋。有時覺得佢哋錯，我會鬧佢哋，因為我唔想好假咁樣。」對粉絲都絕不會戴上假面具。
4. 夠命大 EQ高
有指洪卓立曾經傳過1800次死訊，大家咁恨佢死，正常人都嬲，不過洪卓立就話唔介意，仲順應民意推出歌曲《陰陽路》，仲成日拎自己開玩笑：「我今次又點死呀？我就唔介意，相士話我條命好硬淨，應有啲福可以享吓。」證明洪卓立EQ勁高，厲害！
5. 工作要求高
不過要上位，最重要始終係講實力，所以洪卓立一向對自己要求好高：「我係好麻煩，唔係最好嘅歌都唔會錄。因為出嚟效果唔好邊個受呢？到時外面又會話我唱得唔好，最少我要自己覺得好，如果首歌出到嚟冇反應都冇辦法。」綜合以上優點，再加上今次爆喊贏盡同情分，唔知大家有覺得佢有無機會上位呢？